پلانی بازار

بونگپ: پلانی بازار.


کئور و کوھانی میانجیء درچک و دارانی چپ و چاگردا پلانی بازاز ات.

اھدیگیں زمانعگء مدام بلوچ کوہ و کئورانی گور و کران کہ اودا زئید و کھچر شرتر بیتگ انت بلوچ نشتتگ انت بھارگاھان و حامینان پدا پہ شھرا آتکگ انت.

او آوھدان سال باز وش بوتگ انت ھور باز بیتگ و بھار و بھارگاہ بیتگ کہ کوہ و ڈئنان و جمپان پترونک و ڈولوک شینزگ زیروک و دراھین درچک پل بوتگ انت. کئورانی درچک بید و گز کلیر کونر و جور پل بر و زرد و ڈولدار و وش بو بیتگ انت.

او پدا مردم مالدار بیتگ انت پس و میش و ھورت و دلوت اش باز بیتگ و شپانک دار بیتگانت.
بھار گاھان چہ شھرایش لڈیتگ و کموکے دورتر چہ شھرا شوتگ انت ھما جاگاھا کہ آپ و زئیدے و کہچر گہتر بیتگ پہ مال ھمودا گدام اش جتگ نشتگ انت.

شپانکان رمگ چارینتگ و چہ چونتے شنکا یکے ھمائیگ بوتگ شپانکے شام و رت پہ پینڈ بوتگ گیشتر بازارے ڈعڈتریں کماشے لوگء آپ و لاپ بوتگ.

ھنچوش این وھد ھوں بیتگ کہ شپانک وت و رمگء وانڈہ بیتگ ھچ بارارا نیاتکگ بس واس داران شوتہ سرے پر کتگ و چاریتگ اش بلے بئید بہارگاہان.

بلے گیشترشپانکء صباحان رمگ کوہا چارینتگ و بیگاھان پہ گیس واتر بیتگ. بھارگاہان واسداران یا شپانکء بلے گیشتر مردمان صباحان رمگ پہ شیوانء بورتگ روچ کہ اندازہے برز کشیتگ رمگ اش پہ بازار آرتگ.

چوکان شنیک پچ کرتگ انت کہ پس شیرا شرتر ایرے دئنت و شنیکان یک و دو گوٹ شیر متکہ چوکان شنیک داشتگ انت و جنینان پس دوشتگ انت بیگاہان کہ مغرب بیتگ ھوں ھمے ڈولء رمگ آتکگ و شیر دئیوکین و لاغرین پسان کدیم اش داتگ انت و مٹ و مار اش کتگ انت و ماں واڈا اش کتگ انت پاچن اش بستگ انت کہ پسان جنت انت فروش انت و لنگ کن انت.

اے دگہ خر و ھوشتر و گوک اش ھوں ھمے ڈولء کاہ و کدیم کتگ انت و ماں بنجاہ ایش بستگ انت کہ دگہ ھمساھگان دل سیاہ مکن انت.

او شیر وملکی روغن و شیلانچ موچ بیتگ گیشتر مردمان مستگین شیر و ملکی روغن و ازگند تریکینتگ و نگن اش ترونی تریت گتگ گون تازئین پیماز یا پیمازی بونء کپ کتگ واد جتگ وارتگ، جنیان ماں یک ھیرانے و مردینان ماں دگہ ھیرانے ھور بیتگ و شام ناہاریگ اش وارتگ.

شپان دراھین مردم کماشے پترا دیوان بیتگ انت شعر و شاعری و آس و روک بیتگ صاد و پیش اش ریستگ و چوپتگ و پات و کچو اش گوپتگ و دوتکگ و گپ و رپ و قصہ و گوش و قند بیتگ.

اگاں یکے نادراہ بیتگ گوڑا دراھین مردم ھمآیی لوگء دیوان اش کرتگ و ھر یکے گون درمان و دارگے آتکک.
ھر یکے پہ آدگرے مھر و دیدار زروک بیتگ و یکدگرے مدت کنعگء شودیگ و تونیگ بیتگ انت گؤشیگء یکین پت ئیگ و ماتے چوک بیتگ انت.

جنیک و بچیک محرم و نا محرم برات و گوھار بیتگ انت کسء نزانتگ کہ برات و گوھار انت یا سیاد و تریزاتگ ناکوزاتک انت.

کسانین زھگان چہ دراھین مسترینان ترسیتگ کہ ما اگاں بدئین کارے انجام بدئین مسترین مارے جنت یا مۓ پیسان حالے دئینت او مسترینان ھوں دراھین کسترین وتی چوک حساب کتگ انت.

جنیک و جنینان آپ چہ کئوران یا چہ کہنان اورتگ بازئین جاگاہان کہ کئوران آپ نبوتگ یا کہ کہن نبوپگ گوڑا چات بوتگ مشک و کلیگ و لوھیگ و کتل اش پر کتگ و پہ سر و بڑ اش آورتگ و مشکانی آپ سارت وش بوتگ.

امردمان صباحان وتی اولاکان سوار بیتگ و شھرا شوتگ انت و بیگاھان کچو اش پر کاہ و کدیم کتگ انت پہ مال و دلوتان و ورعگی نیبگاں ماں اولاکان اش لڈیتگ و سوار بیتگ و لوگء آتکگ انت.

یا کہ صباحان کچو اش چہ دلوتی خاک و رؤڈ و سماتء پر کتگ و پہ شھر ا برتگ انت مچ و ڈگار اش خاک و زور کتگ انت کہ اسپوست و جو گندم نبیگانی بر و ثمرہ شر وش طامدار بہ بنت

لہتے سبارگ صباحان بورتگ گون و لھتے نیمروچان چوریگان بورتگ انت و لھتے کہ کستر پاد نہ بیتگ آئیانی سبارگ لوگ بانوکان گون دگہ چوکان دیم داتگ کہ وتی مردمانی سبارگ اش بورتگ انت.

جنیک و بچیکان ھمراہ بیتگ انت دارپیش اش چیتگ کہ شپان آس و روک اش کتگ و کنورور اش کرتگ. او بہارگاہان امراہ بیتگ انت کونل پیملوک پترونک و چژوک و ھالکو و دگہ ھزار ڈولین ورعگی درچک و سبزی ھئلڈو اش چیتگ و لوگء آورتگ.

بانکلینک و گندم موسمء امراہ بیتگ انت بانکلینک اش کریتگ و ھوشگ اش پلہ کتگ و ارتگ پہ لوگ ایش ھوں آورتگ پہ اے دگہ مات و برات و گوہاران کہ کسان بوتگ انت.

جنیان کئورا شوتگ ماھیگ اش گپتگ و ناروشت و واداپ اش جوان کتگ پہ شام و ناہاریگء.
او کسانین ماھیگ اش ماں نگنانی تہا کتگ و پہ تین یا گون ریکان اش پتکگ و وارتگ انت کہ وش بیتگ انت مردم چہ ورعگء سعیر نہ بیتگ.

چوکان ھوں امراہیا شوتگ انت پہ لعیب ئیگ و جانے شودگء برے برے مردین ھوں امراہ بیتگ آئپان مزنین گورمان دواء جتگ و ماھیگ سمگو بوتگ انت و گورم سرا سرترپعل بیتگ انت گوڑا مردین و جنین و چوک و چوریگان ماھیگ روپتگ انت و یکجاہ کتگ انت رندا بھر و تھر اش کرتگ انت. او کسے کہ گون نہ بیتگ گون آیی بہر اش گیشینتگ و چوکے داتگ و راہ اش داتگ پہ ھمآی لوگء.
او ھر کسء کہ وشین طامے یا ناروشتے جوان کتگ امساہگان اش توشے توشے داتگ انت و چاشینتگ انت اش.

کسانین چوک و چوریک گون مسترینان ھموک وھد پہ جان شودگ و لعیب و لبائیء کئورا شوتگ انت. مسترینان گد و پوچ و ھیران شوشتگ و کسانین چوکان جان شوتگ اوشناگ گپتگ ماں گورما و لھتے بوک دئیوکائی کتگ.

او جنیکے کہ نام گپتے بیتگ و یکے زامات و نشار بیتگ گوڑ واستارا باز واھگ بیتگ کہ وتی دشتارا بچاریت بلے تا حدے کہ دشتارے طاقت بیتگ گوڑا وت ئے واستارا پیش نداشتگ ھر جاہ واستاری دیستگ وتی دیمی چیر داتگ.

اگاں لوگء بیتگ گوڑا دگہ بلوک و تری و ناکوے لوگء شوتگ یا کہ تولان پشتء چیر ٹپیتگ وھدے کہ واستاری اتکگ.

اگاں کئورا یا ڈئنء بیتگ گوڑا دزگوہاران آئ نام پہ فلانی گوانک و توار کتگ. اگان واستارا زانتگ کہ دشتاری کئورا شوتگ پہ ٹعگی و بھانہ ئے آتکگ کہ آئیء بچاریت بلے ناکام بوتگ.

کہ کئور پرے درچک ودار ڈنگر و جنگل بیتگ کسے کہ درچکے پشتء شوتگ گوڑا راہ گوز و مردمانی چمان چہ نا ھندیم بیتگ. او وھدے کہ دزگوہاران دیستک کہ واستاری ودیگ انت پیسرا ھوشیار بوتگ انت جنیک اش پہ نام فلانی گوانک و توار کرتک.
: او فلانی انگو پلانی نیمگا بیا.
او جنیگ پلانی نیمگا شوتگ و وتئے پناہ و نا ھندیم کرتگ.

مردمان مھر و دوستی باز بیتگ
اگاں ستعر یکے کمزور بیتگ وھدے یکے کموکین مدتے پہ کار بیتگ و دگہ چیزے دست ئے نبیتگ گوڑا حتماں پہ آئی یک مدتے کتگی دارپیش لوگی روپکے تگرد و پات و سوندی گوپگے مدت بیتگ.


بلے چہ فائدہ کہ آ وھدا آسکانی واب بیتگ و ھچ مھرو محبت قدر و قیمتی نہ زانتگ نوکی ترانعگ کپتگ.

ندکار: آسکانی بلوچ