شئر میر غلام محمد آسکانی

بیا منی قاصد او کپوت چاھی*
بلبل گفتار و منی وش گوشین قاضی*

مۓ دلی دوست و ھمدلین رازی*
بند وتی لانکا اصفرا غازی*

رھت و پالام کن دولدولا تازی*
بندی پہ دلبندا زینا ھجازی*

دے رکابا ماں پادان پیشگاھی*
نیندی پہ ونگا دلجم و دراھی*

دار لگاما و بانزلان بازی*
کلیگا آپ کن چہ باغچہا مالی*

تیز و اشتاپ کن مرغ وقاب بالی*
دئور کن چہ بلوچستان زئیدا پہ گاھی*

بیا چہ آب بندان باغین سربازی*
اگاں شپ ترا گیر کنت باندا بیگاھی*

شاما نوش کن چہ کزور کئورا ماھی*
نیند منی برزین ماڈیا شاھی*

ساھگ و دیوانا مڑا گاھی*
گر منی نزدیکین کشا جاھی*

چو سپاھی و راھزنا ڈاھی*
گپان دلگوش کن شر پہ آگاھی*

شنگ کن منی پیغاما باندا گوامگواھی*
مکران دراھین کونڈان ھر جاھی*

گوھرین دپ گالان مے سخندامی*
شئر و پربندان چہ میرین آسکانی*



دست ترینان چست و چالاکی*
پشت اسپیتین کاغدا تاکی*

نقش کنان سطران پر ھوسناکی*
گالان سنگاران پر مداد چاکی*

کہ گورجتگ مارا مرچی دلتنگی*
دل منی ژند انت پیشیگین سنگی*

قصوے وشین گوشان جنگی*
پر زھیروک و طبلہ و چنگی*

یک حکایت پہ مردوران ھنگی*
وش و ڈولدار ات دئور بلوچی رنگی*

جنگ و پیکار گوں دولت فرنگی*
اھدیگیں عادت بیت انت کم رنگی*

پیداگ بیت نوکین دھرے ھمرنگی*
ظاھر انت نوبت پہ نوکران زنگی*

بیا منی شھزادگ مڑا دارین*
مۓ دلے دردانی شری دارین*

کہ غلوے زورتگ ڈیلا مۓ بارین*
دئیان ترا احوالان سئ و چارین*

چہ پیسری مۓ دھرا بلوچ جوانین*
موسمی چار فصلان برکت دارین*

شنزگان وشین ھور بہار چارین*
روغن و شیر و مردم مال دارین*


گوروم و میش و بز شپانک دارین*
گندم و برنج و جوھان سپاہ دارین*

مضاتیگ و شوکشیچی نایان پات دارین*
کیلڈ و کلیر و کونر آپ دارین*

تیہرین ماتبندان آھوگ رم دارین*
مردان گون تیر کمانا صیاد دارین*

راہ روئین نریان تیز و ڈولدارین*
مہریگی گومس و مہارا پل دارین*

مکرانی مردان میر میار دارین*
کہ پہ بزگ و مسکینا خیال دارین*

بست وتئ سر پہ میارا زیب دارین*
گوں بستگین سنجان بلوچ امانت دارین*

چیر چت انت دنیای بی وفا دارین*
وپت انت پہ سیاہ ڈنی سرے دراھین*

سر منی پشت کپت گون غمان گرانین*
گالان پربندان پر دلے ناکامین*

کئ پر ا ے دنیایا دلا بندی*
رئوت کلاتا و ماڈیا نیندی*

قیمتی عطران مشیت چندی*
ڈکم و سیاھین مودان رندی*

ھمسر و بیلانی مجلسا قندی*
بی سرین گال و ٹہلان پربندی*

پر وتی زور و قدرتا گرندی*
گؤش نہ کنت سوج و مصلحت پندی*

شر خیال اے انسان عقلمندی*
کس نہ مانیت پہ دولت و مردی*

شاہ و مسکینے دئور پد و رندی*
اسرائیل پہ دراھین بندگان گردی*

عاقبت روچے ترا ملکموت گیندی*
خرد کنت جسما شر پہ دل ژندی*

کچلین زھران تئ دلا چنڈی*
شاھی بیم دارین گینا تئ سندی*



پیشیگین دئورا میر بلوچ مردی*
رد کنان چندے گال خردمندی*

نیت پر پلین میر کزور کئوری*
میر غلام محمد ابن آدم آسکانی*

مادرا رودینت پہ دل و جانی*
پہ روغن و شیر و بینگا جامی*

من دئیان تعریفے ترا خانی*
یک لائکین اوصافے دل و جانی*

تحفہ و پیش کشے گلندامی*
یاسمین پلے پہ میرے سوغاتی*

رؤستگین سئول و خیلا پشتنکی*
ساھگا سارتین سروا سر تنکی*

جنتی وش بوئین گلا مسکی*
کہ چہ صورتۓ مھرو مادری چکی*

غلام جان وش ات تئ دیوان و مڑاگاھی*
سارت ات تئ کلے ساہ منیند جاھی*

وش ات تئ چار ایں روچ بہارگاھی*
وش ات تئ دیدار و سرا آگاھی*

ھنچو پہ مال و ھنچو باغ داری*
ھنچو پہ سیاد و قوم و راج داری*

ھنگوری ترنجان دل منی کشی*
ھنجر و خالگ و ھناران تئ وشی*

گرد بنین گونگ و مضاتیگان بشی*
سیب و نارنج و لیمبوان تروپشی*

گندم و جو و اسپوست ڈولدار انت*
امب و زیتون و جم تئ آپ دار انت*

کوٹگ و ول و نیبگ گران بار انت*
ذرۃ برنج و جوھان بار دار انت*

بزگل و ھورت و میر شپانک دار انت*
بہار گاہ و حامینا چن و وار انت*

وآنی پر ملکے مردما بہر انت*
چل یک و دیہک پر فقیران انت*




توصیف عرضیت میرین آسکانی*
قوم و خویشانی راج سرداری*

نان دے و ڈاٹار و نگن شانی*
دولدولین نریانا تچوک سواری*

دو تیئ جفتین کارگر انت نررین*
گندم و جوھان و ڈگار گردین*

دو تئ نریان انت قلم گوشین*
راہ رؤ و دمدار و وقاب بالین*

رود باری مھریگ شاھین رفتارین*
منزلان گوازین ایت سئ و چارین*

کزور کئوری پہرا چو شیرا غرروک انت*
شیر دل و نرفیل پنلنگ فروش انت*

سھب و بیگاھا مرکبی سنج انت*
تیز روئین نریان تچوک سوار انت*

پشامگ و آشار تئ پاد رؤ و رند انت*
ھونگ و مورتان تئ راہ سری پند انت*

ھر کس تئ دیدارا امیدوار انت*
مھری پر کلین مردما بہر انت*

بی وس و مسکین و غریب دار انت*
ھمسر و دوست و برادری دار انت*

میر لال محمد کزور کئوری کمان دار انت*
دبی میر ولی محمد راج و مال دار انت*

میر جمال خاتون مکرانی شیر زال انت*
بلوچستانے زالانی درور و رنگ انت.

میر تئ بند و میر آدمی فررند انت*
کہ پر تئ دیدار و گیندا دلبند انت*

میر خیر محمد آشاری دین دار انت*
اشکستگ میر بجار مھمان دار انت*

میر دوستین گیتچکی مڑا دار انت*
کراچی میر دین محمد غضب گوار انت*

میر دوست محمد بزنجکانی سردار انت*
عبدالکریم راج سرجمین باسک انت.

مشکلین کاران شاد و دل راست انت*
لال محمد مورتانی سرا گون انت*

میر تئ حقین وارثی رند انت*
پر ھموک سختیان سرا بند انت*

ملا اسحاق کزورا قلم دار ات*
حاکم و سردار وار و بی زار ات*

ھونگ و مورتان میر اولیاء نام دار ات*
آسکانیانی دیوان و مڑا گاہ ات*

آشار میر داد محمد تام دار ات*
حاکم و سردار زھر و ناچار ات*

جاری ات وشین دھر و روچانی*
جاک و صلوات ات میر بلوچانی*

نیندگ و پاد آیئگ گران املانی*
دیزے نام چیہال ات بانوک کلانی*

سیر و اعروس ات میر فقیرانی*
چاپ و نازینک ات ٹیہ و ٹینگانی*

پترا دیوان ات ھزم و جودانی*
دلجمین ھمراہ گون اتنت جانی*



رفتگ ات میر پہ گوادرا روچے*
اشکستگی مردان روک کت بن سوچے*

جیڈہ و جنگی بی سرین جاکے*
پہ باغی سرکش و مچی سر تاکے*

جاہ جتگ دینارزئ میر و سرداران*
پشامگی مردوارین کمان داران*

میر کریم بخش گوھرام جاہ جت دل تنگی*
میر خورشید ملک محمد لانک بست پہ جنگی*

رفت انت اشتاپ ھنچو کہ جوری*
پترا نشت انت میر کزور کئوری*

دلگوش کن شہزادگ مڑایانی*
میر ترا زیب ایت راج و نام داری*

بلے آتکگین ما پہ زھر و دل گرانی*
مطلب مۓ جنگ و جیڈہ ئے داری*

یا کہ چہ کزور کئورا وتئ بوجیگ بار کن*
قومی و خویشان بل و انگار کن*
نیبگ و باغان سوچ و بی زار کن*
ڈیلا پر مۓ حدا امیدوار کن*

مارا پہ عذر و منت ڈولدار کن*
چہ دوئین شرطان مارا تام دار کن*

میرا گوں شیران مصلحت بستگ*
کزور کئورا دراھیں میرا دل شوشتگ*

میر بجار گونگانی میار زرتگ*
پشامگی زئیدا میرا کوچ کرتگ*

پشامگی پہرا میر منیند جاہ ات*
سرگر و ناؤنت سبز و آباد ات*

نیبگ و باغی بی حساب دار ات*
ھر گورا قوم و خویش و راج دار ات*

پشامگ و بریسک میر برکت خان ڈولدار ات*
جنگل میر عبدالرسول بلند شان ات*

میر قنبر بن کمال خانی پد و رند انت*
میر تیئ راج و جرندے دربند انت

میر کریم بخش و گوھرام پشامگ نام دار ات*
سرکارے دوست و ملکے سردار ات*

میر لال محمد و تاج مجمد نگن شان ات*
میر فقر محمد پشامگی سئول ات*

سرگر میر دین محمد باغ دار ات*
میر ملک محمد پشامگ مال دار ات*

میر فتح ناؤنتی کماش ریش ات*
براتانی سردار و دیوان گیش ات*

غلام جان زامات ات شیر مزارانی*
دلجمین باسک ات شیر شکارانی*

میر میار ات میر پشامگینانی*
پلین سالونک ات میر دینارزئیانی*

مردم میارا پہ چادرا بند انت*
نئ کہ پہ تیران کوڈلین بند انت*

میر شیرجان گون ایرانی نران زھر ات*
مولوی عبدالعزیز زاھدانی سردار ات*

مولوی عبدالمجید پارودی قرآن وان ات*
پیشین مولوی عبداللہ تام دار ات*

دائما للہ زئ و دینارزئیانی جنگ و پیکار ات*
پشامگی قوم و مردم نا چار ات*

ھر دوئین زئیان وت پہ وت واک ات*
پہ ذات و ذریاتا جیڈہ و جاک ات*

کونگران گرند ات جمبڑی جنگے*
میر خداداد نقصان بیت پہ عجب رنگے*

غروک بیت میر خالد پہ دگہ پندے*
میر غلام قادر تفنگ ایر کن پہ سنگے*

نیت پر میر نظر بیت پہ دل تنگے*
شکلین وآن راھی بیت میر تئ جرندے*

بور شلان بیت پر شمۓ پدان رندے*
کہ رفت انت پہ برزین کوھی ماتبندے*

ناگھان گیر کنت مارا یک گرندے*
پہ عاقلین مردان اشارہ یک رندے*




وش دلین دھرے پشامگا بیتگ*
دور امیرانی وش دلی گوستگ*

وش میاتکان یک کونبتے زورتگ*
سینہ زھر وار و دل حسد بیتگ*

کہ میرے نام مسک و میزران بیتگ*
مکران ھر جاھا زران بیتگ*

چہ سیدہ و حقین راست گوشان بیتگ*
تورسی چہ شاھین کردگار بیتگ*

بزان پشامگی مرد واران جتگ فکرے*
سازت اش جنگی حیلہ و مکرے*

شئور اش بستگ ماں سرین دربندے*
عہد و پیمان اش بست پہ سوگندے*

سوج اش میر دین محمدا داتگ یک چندے*
شھید بکن شیرا پہ مقصدی رندے*

میر چرے حالان نا سھیگ بیتگ*
وتئ ھشت نالین نریان سوار بیتگ*

دیم پہ سرگری شھرے نیمگا رفتگ*
خان محمد ابن میرین ماں سرا بیتگ*

رحمان اسرائیل وت روان داتگ*
کہ جنت چیہال و توار بیتگ*

یک بہانہ ئیے پہ بندگان بیتگ*
ربا پہ نا دوست سرا موشتگ*

شیطان عبدالرحمن ابن دین محمدی گوک سوار بیتگ*
سیادی و بندے رشتگی سیستگ*

میرے بیما چہ ترس و لرز بیتگ*
زیادہ ایں زور و پیمانا زورتگ*

یک اناگاھے پہ بی ڈاھی آتکگ*
دستی پہ مرد وارین ردا برتگ*

میر ھما دیما جنت رفتگ*
جاھی ماں باغین فردوس گپتگ*

چاردھی ماھا ماہ گرا گپتگ*
پشامگ تا آشار تھار بیتگ*

سرباز دراھین دنزے مان شانتگ*
باغ تئ پلین چہ دنزا گین مرتگ*

شاتول و کبگان نالئگے زورتگ*
بزگل و ھورتان پہ زھیروکی گریتگ*

مھریگ تئ بنجاہ سرسران بیتگ*
غاریتگ پر واھوند کہ زوال بیتگ*

مئ کمر آ روچی غمان فروشتگ*
کہ ساھگ تئ بچانی سرا رفتگ*

خیز کتگ تئ بوران چو کوکوری گرندا*
سیستگ اش تیل مھار گون سربندا*

ارس شلان بیت انت بہ راہ روئین پندا*
میر یار محمد و سید محمد جوانین سر چنڈا*

سوار بیت انت تئ نریانان غضب گرندا*
تیز و اشتاپ رفت انت راھبندا*

بیڈو برت یکے پہ سرکارے جرندا*
یکے پہ میرین لال جانی رندا*

بیا کہ جنئگ بیتگ میر میار دار این*
لائکین سردار شیر سپاہ دارین*

کزور کئوری شھزادگ مڑا دارین*
ایری کت وشین نامے یادگارین*

جاہ جتگ نؤدان چہ چابھاری حدا*
ریتکگ انت باغین سربازی بندا*

گیشتر کزور کئوری دراھین ماتندا*
قومی و سیادانی درستین دلبندا*

جونزیتگ کوھین دل جگر سندا*
رونبتگ کلین قوم پہ دل ژندا*

پر دلے غمگین ایں و دپ قندا*
پر تئ دیدار و آخری گیندا*

جونبتگ ایرانی لشکر پہ جنگی*
ھر وڈین پیت دار و بازرس سرھنگی*

نزیک نیل انت ھمبلان جانی*
میتا ھچ پیما نہ دئینت شانی*

میر جسم سئ روچ تاکہ ایر بیتگ*
چو چاردھی ماہ نور عیان بیتگ*

زعفران رنگے میرا مان شانتگ*
پیشانیگ فردوس مھر نشان بیتگ*

نازرکین صورت پراہ و جوان بیتگ*
چہ جنتی وش بوئین گلان بیتگ*

حکم شاہ ایرانی بر قرآر بیتگ*
دکتر چہ تہران روان داتگ*

برادران پہ جانی کوپگ زورتگ*
خواھرا چاپ و صوتے مان بستگ*

عالم و ملایان تمام دیستگ*
گون وت و سواسان قبرا واپینتگ*

غلام جان رفتگ یک ملک و کشورے دورین*

وپتگ ماں قصر و بادگیرے شیرین*

رفتگ و واتر نہ بیت میرین*
دشمن و وش میاتکان تئ بلاہ زیرین*





نیندان دیوان و مجلسان شآنی*
ھمسرانیگ و برادران خانی*

وش گوشین گفتارے کنان جوانی*
نوکی قصوان کاران میر غلام جانی*

آدمی فرزند مرادبخش این*
ناز و نایافتین جوان دلکشین*

یاقوتی درے دانگ نقشین*
لنکوک و مندریغان قلم کشین*

آپریمشومین دستمال کماش ریشین*
گون دوئین براتان دلجم وشین*

سئ گوھارانی برات سر کشین*
نازرکین دیم و سر ھزار لکین*

دشمنان ایرگیر کت فولاد مۓ سکین*
بریت اش ترین لیمبو مئ وشین*


غلام جان وتئ قوم و راجے تاج دار ات*
طالحی نیکبختن سرا یار ات*

چوڈی ماں دیوان بلند شان ات*
گالی پہ سرکار روا دار ات*

گریشگی شیر و فیل بیم دار ات*
راہ و رفتارا تیز و دم دار ات*

رودباری پلین مھریگ سوار ات*
مکران دراھین راہ و رفتار ات*

ھر کسی دردان میر شری دار ات*
پر ھموک کارا میر کمال دار ات*

بزگ و مسکین و میار دار ات*
راہ گوز و مھمان بی حساب دار ات*

نیک نمازی میر حیاء دار ات*
شریعتے اسلام وفا دار ات*

مجلس و دیوان شکر گال ات*
ملگین بالاد گوں ڈیل ڈولدار ات*

بستگین راجے آھنین پل ات*
چور و ناچارا خیال دار ات*

دشمنان جورین دائم زھر ات*
حاکم و سردارا گر و دار ات*

اھل و اولاد و میر سپاہ دار ات*
قومی و خویش و سیاد و راج دار ات*

غلام جان ھشت تئ فرزند و پدی رند انت*
لوگ و جاگاہ و اھل و اولاد انت*

عبدالوھاب آسکانی شئر گوش جرند انت*
پر وت توصیف چہ مۓ رما رند انت*

احمد جان منی ولی عھد و حقین دلبند انت*
مجمد جان شیر وار و کسان مرد انت*

مریم جان کلے بانوکین پل انت*
آسکانی دبی نشتگ و درئنگ انت*

آدم جان چہ دبی سرکاری پولیسان انت*
سھب و بیگاہ سوار و ٹاگار انت*

گون سرکاری قاضیان گر و دار انت*
سنگت و یاری باز و بسیار انت*

طاھر جان لوگ نشتگ و مئک انت*
دستی پر ڈال شاھین بروتان انت*

براتانی دراھین پشت پدی مرد انت*
مجلس و دیوان و مڑا دار انت*

یوسف جان سرکاری حساب دار انت*
راہ گوز و مھمان و میار دار انت*

ساھگی سارت و دیداری وش انت*
میر تئ تاج دارین سرے مٹ انت*

یعقوب جان چہ افسران ایرانی قلم دار انت*
پیش سرکار پال روا دار انت*

مردے راج دوستیں و نیکو کار انت*
مشکلین کاران ھر کسی یار انت*


سئ تیۓ خاتونین پری رنگ انت*
قصری گران مل و بانوکین پل انت*

بی عیب و وشنامین نماز وان انت*
مادرے شیر زالین سرے مٹ انت*

غلام جان درست تئ حقین فرزند و رند انت*
بلے نے کہ تئ نامدارین سرے تروک انت*

ترگایان من پہ کشوران کونڈا*
میناب تا تربت باغچہین سندا*

لاشار و نیکشہر چابہاری حدا*
سراوان تا بمپور و قصرقندا*

پنجگور و ھاران سیبی ئے جرندا*
پیشین و تمپ و سورو و مندا*

بولان تا مزن کئور کیچی دربندا*
زاھدان سوران خاش و سرحدا*

من نہ گیندانی مٹ و مانندا*
تئ بدل پیداگ نہ بیت رندا*

مکران دراھین کوچیگ و بندا*
آدمی فرزندے ڈولین وش قندا*



میرا شش ماھے پہ حساب گوستگ*
تھرانی شہرا ترونگلے گورتگ*

فروشتگ ات دھر و تریتگ باریگ*
شیرے جاگاہ نشتگ شکاریگ*

شاہ ایرانی نوبت در رفتگ*
دینکار چہ زندان رھا بیتگ*

تا دو سالا تئ بیڈ گروک بیتگ*
مردمان دیوان رو آ بیتگ*

پر تئ بچان انتظار بیتگ*
بچ کسان و بی میار بیتگ*

مادر وتئ سالونکے غمان فروشتگ*
یک نہیبے پہ لال جان داتگ*

شرین زال یک چاچای بستگ*
یک شگانے و بد و ردے گوشتگ*

لال جان بچ کسان انت و بی میار دار انت*
یا قسمت منی بچیگے بیڑا پر من بیار انت*

نشتگے لوگ و ساھگ ات سارت انت*
بچ منی میرین ماں جنت واب انت*


شؤر کتگ نوجوانیں کسان سالا*
چو پلنگ و نرشیری چالا*

یادی کت رب و گوشتی انشاءاللہ*
رند چہ سئ روچ گر ات منی حالا*

لال محمد ابن آدم مرد وار این*
کزور کئوری نوجوان کمان دارین*

بستی پہ لانک تیغ سپاہ دارین*
گپتی پہ دست اصفر آب دارین*

تنھا گون دینارزئیانے دئیان جنگ*
پر بلوچ عیب و تھانہ و ننگ*

یا کہ فروشان من زحم جنین دینگ*
یا کہ نوش کنان مرگا وتئ برادرے رنگ*

دئور کتگ سربازی پلنگ فروش*
چو سرسری باد رفتگ پر جوش*

پشتے بازار نشتگ پہ دراھی*
میر دین محمدی جاگاہ منیند جاھی*

روشنین روچ کہ برز سرا بیتگ*
دیم پہ شھر میر دین محمد روان بیتگ*

دہ دھا میرا چاہ جت بی واری*
پاد و رفتار میر گشاد داری*

شیر و نرفیلان ھر دو چار وارتگ*
میر لال محمد ابن آدم پیش سلام بیتگ*

میر دین محمد منی برادرا سردارین سلام سر کن*
منی غمزدین حالا صدق و باور کن*

چار روچی امروزا چدا بس کن*
امب و زیتوانان تو ھوں رخصت کن*

غریتگ مرد وارا خراب کارین*
وارتگی میر دین محمد ابن میر علی محمد نام دارین*

وش دلی بر گشت میر زباد مالین*
پر غل و شان رفت کلا راہ چارین*

مادری حال دات انتظار دارین*
شادھی کرتگ کرور کئورا دراھین*



رونبیتگ میرخورشید گون ایرانی ژاندارا*
کہ من گران میرآخرمرادی دینکار*

گیرہ کت بازار دراھین سرکار*
لال جان کوہ کپتگ پشت بازار*

جاہ جتگ چست دینارزئ شیر زال*
خورشید تو بستگ مست وبی سار*

زانان ترگ نیل ئے بزگ و وار*
چونت برے لوٹے مٹے دیندارا*

منی ناکوگ وارتگ مٹ وتئ پاری*
گوڈیتگ مۓ سؤل بی خیال داری*

میر خورشید ملک محمد باز غضب داری*
سرکار بلوچی پہ فارسی ترجمہ کاری*

سرکار بیتگ چہ میرخورشید بی زاری*
مان ترینتک سرکار پہ عذاب داری*

فروشتگ شکایت مردان تہرانی*
رفتگ انت فوج و لشکر ایرانی*

چندے مدت گوستگ چی بارئ*
میر نبی بخش فتح داریت غلہ و زاری*

وارتگ ما افسوس باز و بسیاری*
پر بی گتین مرگ میر غلام جانی*

میر دین محمد داری سیاد و بند داری*
شما نہ کت فکر و مۓ خیال داری*

کزور کئوری مردان نشتگ انت جارین*
کاغدے شخصاتگ پشامگ بارین*

پیغاما گوشتگ غلام جان بی میار دارین*
چیر چتگ دو شھزادگ مڑا دارین*

میر فتح ونتگ خط حساب دارین*
میر ملک محمد فکر جت نام دارین*

دیوان نشت انت مصلحت دارین*
صلح و ترانے بست اش کمال دارین*

یک دل و جان بیت انت سیاد شری دارین*
شیطان اش تاچینت شوم خراب کارین*


آسکانی شئرو پربندانی لگاما گر*
گوھرین گالانی بندگ گونڈ گر*

بی درین مردانی منت کم گر*
مردے کہ اشتاپ انت پدانی گر*

راستگین راھے نیمگا سر گر*
بیتگے راھا نیند وت گوات گر*

دست پہ ربے درگاھا چست کن*
دعای و فریاتے گون رحیما کن*

پہ دوستی سردارے دو جھان کن*
بخش گناھان و مۓ دلا صاف کن*

کلمہ و ایمان مۓ نصیبا کن*
فتنہ و شر ا مارا پرھیز کن*

روچے دیدارا مارا امیدوار کن*
گرماگا عرشے ساہ مۓ جاہ کن*

شفاعتے رسول مارا ھمبر کن*
جنت الفردوس مۓ دلے بھر کن*

ما گناہ کارانت تو مرحمت کن*
عاصی ئے دراھین گناھان درگذر کن*