سرگال: شوم ایش گوشپ بیا نیکبخت بی گؤشتی منا چہ کار نیکبحتی اینت.
یک جوانے ارادہ کت کہ من روان گون خدا خبر کناں وتئ بخت جست ئیے کنان چو حضرت موسی یے ڈولء.
گڑا جوان رہادگ گپت دیم پہ ٹوہین کوہی ماتبندے کہ گون خدا خبر بکنت وتئ قسمت باروا.
راھا کہ روان بیت ڈیک دات یک لاغرین شیرے، شیرا جست کرت کہ واجہ دیم پہ کجا گور ایت (کجانگوریت) بستگ و روانئے ، جوانء جواب دات کہ بلہ من روان پہ اے ڈولین جستے گنئگا گون واچہ خدا،
شیرا گؤشت گڑا واجہ منئ کلوا ھوں واجہ خدایا بدئے کہ باز مدت انت من نادراھاں من چہ درمان و دارئگان در منتاں بلہ تاں اگاں من دراہ نہاں منی علاج چئے انت.
خیر ! جوان رھادگ گپت دیماتر شوت، ڈیک دات یک دھقانے کہ ڈگار گردینگایت، اشیا ھوں جست کرت او جوانا ھما ڈولء وتئ قصہ گؤشت، گڑا دھقانا گؤشت واجہ منی کلوا ھوں بدئے کہ من باز محنت کناں بلے منئ ڈگارے پل و ثمرہ شرے نہ بنت.
خیر! جوان دیما رھادگ گپت پدا ڈیک دات یک بادشاھی جنیکے کہ سیر و سانگی نہ کتگ ات.
جنیکا ھوں جست کت و جوانا ھما ڈولا وتئ گپ گؤشت انت.
جنیکا گؤشت کہ منئ کلواں بدئے کہ من وا جنین چوکیاں چطور کناں کہ پادشاھی حکمء داشت بکناں.
خیر ! جوان شوت پہ کوھا یک غارے نشت و اللہ اللہ و عبادتی کرت یک شپے وپت وابی دیست کہ خدایء گؤشت تئ قسمت سک شریں تو اگاں ڈوکء دست پر بکنئے ھما ڈوک ھوں طلاہ بیت. گڑ جوان باز گل و شادان بیت پدا واتری کت آتک.
ڈیک دات بادشاہ جنیکء و جست ی کرت کہ ھاں جوان باریں قصہ کن، گؤشتی تو اگاں سانگ و سیر بہ کنئے سک سیر و نامداریں پادشاھے بئے، جنیکا گؤشت گڑا چہ تو شرتریں جوان منا گیر نہ کپیت بیا گوں من سیر بہ کں، جوانان گؤشت نہ وے انگہ من وتئ جوان یے مراد نہ چشتگ.
دیما تر شوت ھما دھقان ڈگار گردینء جست کرت ھاں واجہ باریں حالاں دئے، جوانا گؤشت
تو پہ چو بزگ و بدبخت ئے تئ ڈگارے سنداتے چیرا گنجے ھست
دھقانا گوشت بند سک مزن انت من تنہا ھروتک یے نہ کناں بیا من و تو ھور بیں گنجء درکنین نیم منئیگ و نیم تئیگیں تو ھوں شرشر سیرے لاپ بئے من ھوں، جوانا گؤشت کہ نہ وے انگہ من وتئ جوان یے لذت انگت انت.
گڑا دیما رھادگ گپت و شوت ھما لاغریں شیرا گوں دوچار کپت، شیرا گؤشت حالان بدئے بارین منئ نادراہ یے علاج چئ انت، جوانء گوشت کہ بلہ تئ نادراہ یے علاج یک جوانیں مردمی سرے مئجگ انت، گڑا شیرا فکر کت کہ طلاھے سودایں وا جوانیں مردم ھمیش انت دگہ چہ اشئ و جوانتریں مردم من نہ رسیت،
گڑا شیرا جوان شہمات کرت دو شہماتی جت جوانے سر تل بیت و مئجگی ظاھر بیت انت شیرا چٹیت و چیت و وارت انت و پدا دراہ و جوان و زرنگ بیت.
جارکش: آسکانی بلوچ.
