بیا قاصد منی دولدول سوارین

بیا قاصد منی دولدول سوارین.
منی دوست ھمدل ؤ طوطی مکالین*

بجن شئرے بلوچی وش توارین.
کپوتی زیمل ؤ بلبل گفتارین*

بکش خطان قلم سونٹا طلاھین.
عجب سینگار بکن نقشان نگارئین*

پہ پشتے قرطاسی تاکان زیبدارین.
بگوارئین گوھرین گالان ڈولدارین*

پر انت دفتر چہ گالان مروچی.
امیرین شائر ؤ شئران بلوچی*

مضاتیگ ریتگ ؤ پات انت کروچی.
گون کپتان ھمے راہء دو روچی*

گوشان گالے عجیب ؤ نوجوانین.
حکایتۓ چو نوک ؤ در میانین*

چو پیشی شائران دفتر مثالین.
چہ گفتاران بلوچی در مکالین*

بداران ماں پنجگان چنگا گؤشوکین.
گون ڈھل ؤ ڈوکر ؤ طبلان جنؤکین*

پدا بؤد بیار دلان عاشق توسؤکین،
ھما کہ نشتگ انت عہدان غنوکین*

مدام گون بی وسین دردان سوچوکین،
شپادا جنگل ؤ دئرر ان تچوکین*

بیا ٹپان دواء کن عاشقانی آزروکین.
شپی پاسان جن انت آھان مروکین*

چو شیری گولڈ ؤ گرکء درھوکین،
فقیری نالگ ؤ ارسلان شلوکین*

اے عشقۓ بزگان دل داتگین انت،
دواء شانی رباب ؤ عشقے سازانت*

مریدی شائر ؤ زھیروکی تارانت،
گلانی حلوۃ ؤ گالے توارانت*

مروچی گورتگ ھورء ؤ روچ درای انت.
رزینتگ سریگ گلے مہناین سرای انت*

گوشے انگہ گلے ملگور درای انت.
عجب دوچین گلء پشکے گورای انت*

دل اؤں زنگین گلے یاد ؤ غمای انت.
شپانی گپ رپ ؤ راز اؤں دلای انت*

پمشکء ھر شپء دل مۓ نرودیت،
ڈئک چو کودکین چوکان بندیت*

گلے گوستگین خیالان واب گندیت،
گالان دلکشین پہ گلء پربندیت*

گوشیگء جمبڑان شیکے در آتکگ.
نؤدان سجمین آسمان سجینتگ*

حالے قاصدین مستاگء آرتگ،
وش وشء من ئیے گوشء چو گوشتگ*

گلی جان مرچی چہ کیچء بیاتکگ.
پمشکء دوشی منی وابء نیاتکگ*

روان پہ جوڈئیان گل جان وش آتکگ.
گلے چمان چو تیرا دل مۓ کمایتگ*

گؤشۓ چو چاردھی ماھا پر آتکگ،
چو نگینین درے یاقوتا درآتکگ*

تنک انت دیم گلے صورت جمالین،
گون رنگء گندمی گردن غزالین*

سرا تاسین ؤ لونٹان کاغدینان .
گون ڈولدارین مچاچان دلبرینان*

تپہ انت دنتان گل مورواردینان،
دراجین لنکوکان آبریمشومینان*

گروکے جنت گلے گیوار چو نوکء،
گون سیاہ ؤ ڈکمین زلفان شروکء*

کپوتی چم گلے بروان تجوکء،
گون آسکی دیدگ ؤ کنڈین زنوکء*

تپوک جنت گلے جیگ بند چو روکء،
چولمب ؤ والیگان گون کیدا یوکا*

سرا رندیت گون ھما دستۓ سروکء،
گوشۓ سروے کہ رؤستگ لوگۓ توکء*

گورے ھارۓ کوش ایت تئ نازنینان،
تئ غموار ھدؤک ؤ واھگینان*

گوشے درء پہ سبز مانداتگینان.
گون دستے چوڈیگان تاب داتگینان*

دستۓ مندریغان ڈولداتگینان،
یاقوتان عجیب ؤ نازورکینان*

پادیگ زرگری آپ داتگینان.
دلء سند انت تئ غموارتگینان*

کمان میانین جنک گوھر مثالے،
گون برز ؤ بارگین قدء چو ٹالے*

رنگ ؤ صورتء وشین دپ گالے،
گوشۓ یک زرگری دستے کمالے*

کسان ؤ خردلین نوجوانی سالۓ،
پہ چم ؤ چارگا چوشیری زالۓ*

بالاد سکھین نایافت خیالے،
زلیخہ زینت ؤ یوسف جمالے*

سجین ایت گل وتء بانوری چالۓ،
زباد ؤ مھلبان درنزیت گلابۓ*

دستے حنیان ناز ایت پہ دآبۓ،
زلفان گرھن دات یک پیچ ؤ تابۓ *

دل اؤں ھست پہ گلء جست ؤ سؤالۓ.
درھیت دل مۓ ؤ مانبندی یک چیھالۓ*

مدام نشتگ وتئ کلے دریگء،
گودا دوچ ایت سرے زانء وتیگء*

چیٹین چادر ؤ جارجنٹ سریگء،
گورے شال مسقطی سوداگریگء*

منی ھانی توے ؤ من شئ مرید تئ،
طبیبے تو منی ؤ بیماران من تئ *

توے ظالم منی ؤ مظلومان من تئ،
پہ مرگون منیتگ خاصئین سرا تئ*

گلی خاصئین وتئ مئ ساہ ؤ جان انت،
گلابے پل ؤ مسک ؤ زعفران انت*

مئ کلے طلاھین تاج ؤشآن انت،
مئ دکتر طبیب ؤ محرمان انت*

نسیم صبح ؤ سارتین ساھگ مۓ،
تن ؤ زندے سپاہ ؤ تحفہ انت مۓ*

گلی حورانی پلئین دلبر انت مۓ.
تاروکین شپانی روشنای انت مۓ*

عبدالوھاب کنار گر تو وتا چہ نازنیان،
وفا نیستن گلان وش صورتینان،

مروچیگین جنیکان نازگلینان،
ھزار نازین جنیکان تنسوکینان*

خدا رحم کن پہ ما درستین غریبان،
پہ دوستی سرورے دوئین جھانان*

عطاء کن رحمتان پرکلین مسلمانان،
در گذر کن اے عاصی دراھین گناھان*