او منی قاصد بانزلان تاب دئے

او منی قاصد بانزلان تاب دئے _ ھزمتان گیشیں دمے موہ دئے

اے منی نوکیں خط و رھبنداں _ وشیں پیغامء مکران دیم دئے


دنز، ھؤر سایں بئے گسر راھا _ منزلے دوریں بانزلان سوء دئے

وہدے سر بوتئے گلزمین باغین _ دلجمن بادگیرا بانزلان ایر دئے

نند یلیں دیوان مجلسء شاھی _ پلیں بلوچستان مہتران ڈاہ دئے

سوچ و دپ گالان یک پہ یکیئ _ مۓ نصیحتان دیوانء گواہ دئے

راستیں رہبندا مۓ گؤش کند کن _ ملک سرداران سرجما پوہ دئے

ملک، بہار گاہ ڈیھ مۓ ڈکالیں _ تستگین مردانی دلء ساہ دئے

دئے رسالتء صاحب عقبالاں _ لایقیں مردان دراہی واہ دئے

مشکلین سختان پیسرا گوازیں _ گڑا، لاغر لیتیں دلوتان کاہ دئے

روچ ترپشناک بے وسیں مخلوق _ زہگ چوریگان ساہگے جاہ دئے

آسکانی فریات ئے خدا دراہ دئے _ پلیں بلوچستان دلجمیں شاہ دئے